الإجدابي – 2004
كان الانقلاب المشئوم الذي حدث في الأول من شهر سبتمبر عام 1969 نقطة فاصلة في تاريخ ليبيا الحديث .. فهو كان البداية لمرحلة المعاناة والتدمير لليبيا وشعبها ومقدراتها .. ومنذ ذلك الحين والى اليوم توالت الهزائم واستفحل نزيف الخسائر في أبشع صور العبث والخسة والتآمر ..
إن شاء الله تبكي عليهم عيشـه
كيف ما بكت رغده علي صدام
ينهارعرشهم وتصيرله ْطرطيشه
مـاحكم ظالم يـوم قالـوا دام
يفْتك شعبنا من هول هالمعيشه
اللي ماتردى .. منزوي منضام
يصفى جوها من بعد تغبيشه
ليبيا العزيزة ان راجعن ليام
يروق وطنا وتسيرله تنعيشه
بعد الجدب.. نوّار خيره عام
وينوضوا ضناها كبودهم تغشيشه
من حكم شله فاسده .. و أزلام
ياويلهم من شعب ساند جيشه
نافض غياضاته على الاقزام
اللي ملوها.. زور بالتبكيشه
وكذب ورزاله كوم فوق اكوام
ابقي شانها بين الدول تلطيشه
وضيعة عربها .. ماتريد كلام
في اوطان الغرْب جاليين طفيشه
من حكم جاير في سنين ظلام
واللي قعد امعيشة عدوك عيشه
غصه كبيره تقول شغل افلام
الوطن المظلم زاد في التوحيشه
بافعال السفاله من ضنا الحرام
واكلين ناقة ربنا.. و ْخليشه
والبر والبحر حطوا عليه اختام
ورود المناهل مارون تعطيشه
ولا ْصدروا من غرف الفلوس ابشام
وبترولها ضايع امعا الترميشه
ماعقبوا مخزون هللي خام
حاقدين بدعة .. مدمنين حشيشه
ضنوه عطيبه راضعه الاجرام
جناب الأميرة سمحة الدوديشه
زهاها شقاك وخربتك يايام
والخيوه اخياب ووزنهم كى الريشه
لاعقول تنفع وخاويه الافهام
وسيد العويل انكان ريت ربييشه
امودر زهاه الوطن ماعاد قام
حنش منطوي تسمع امغير وشيشه
امعمر اللي مسع إلقي لزّام
غضيب منفلت صايل امعا التكفيشه
لسياده ركع.. ركعة عبيد اصنام
صقر التحدي من بعد تكويشه
اليوم منخزي عالطز مايلتام
وماعاد تسمع غير صوت فشيشه
لامريكا باعث جواب غرام
ارضي عليه ولبْسّيه البيشه
لا بيت واثق.. لا ْهناك ارمام
خوف حمر متسلط عليه رعيشه
امغير ياامريكا.. زوْديلا عام
لاخير ناوي في العباد نهيشه
ولا الصالحه منه اتجي في منام
في الغمد واتي سيف عالتخشيشه
وريث عرش الدم في الختام
ويللي اطمعتوا فيه بتبشبيشه
صيوركم على سوق الربا خطّام
نادمين حسرة من بعد تدشيشه
امخلفلكم زقوم نار حْطام
وياويل خاين منخدع في طيشه
وناسي وراه حساب يوم الطام
يوم شعبنا ينفض ْغبار شليشه
وينوض مارد ماخْضع لاوهام
قريب ايزول الليل وتعشعيشه
ويبان ضيها ماعاد فيه غمام
أخبار الـ BBC
و صدقت النبوءة !!!!
يوم شعبنا ينفض ْغبار شليشه
وينوض مارد ماخْضع لاوهام
قريب ايزول الليل وتعشعيشه
ويبان ضيها ماعاد فيه غمام